LeBron James: Durant á skilið að vera kosinn bestur

Bandarískir fjölmiðlar fóru að slúðra um það í kvöld að það verði Kevin Durant sem fái verðlaunin sem mikilvægasti leikmaður NBA-deildarinnar í körfubolta á þessu tímabili.

LeBron James hefur verið kosinn bestur undafarin tvö ár og alls fjórum sinnum á síðustu fimm árum. Durant varð í öðru sæti síðustu tvö tímabil en er nú loksins númer eitt samkvæmt heimildum ESPN og fleiri miðla í Bandaríkjunum..

LeBron James var í framhaldinu spurður út í fréttirnar og hann viðurkenndi fúslega að Kevin Durant hafi verið sá besti á leiktíðinni.

„Ég ber mikla virðingu fyrir honum og hann á þetta skilið. Hann er búinn að eiga alvöru MVP-tímabil," sagði LeBron James.

Kevin Durant var með 32,0 stig, 7,4 fráköst og 5,5 stoðsendingar að meðaltali í deildarkeppninni en hann hitti úr 50,3 prósent skots sinna, 39 prósent þriggja stiga skotanna og 87,3 prósent vítanna.