Madrídarliðin mætast í úrslitaleik Meistaradeildarinnar

Atlético Madrid vann 3-1 sigur á Chelsea á Stamford Bridge í kvöld og tryggði sér með því sæti í úrslitaleik Meistaradeildarinnar í fótbolta þar sem liðið mætir nágrönnum sínum í Real Madrid.

Fyrri leikurinn endaði með markalausu jafntefli og þetta leit vel út fyrir Chelsea-liðið þegar Fernando Torres kom liðinu yfir á móti sínu æskufélagi. Atlético jafnaði hinsvegar fyrir hálfleik og gerði nánast út um leikinn með því að komast í 2-1 eftir klukkutíma leiks.

Chelsea þurfti þá tvö mörk og svo þrjú mörk þegar Atlético bætti við þriðja markinu tólf mínútum síðar. Diego Simeone er að gera ótrúlega hluti með Atlético og leyfði sér að taka eitt Mourinho-fagn þegar þriðja markið datt inn.

Atlético Madrid og Real Madrid mætast því í úrslitaleik Meistaradeildarinnar á Leikvangi Ljóssins í Lissabon þann 24. maí næstkomandi.

Spánverjarnir hjá Chelsea, þeir César Azpilicueta og Fernando Torres,  bjuggu til fyrsta mark leiksins á móti löndum sínum þegar Torres skoraði úr teignum á 36. mínútu eftir undirbúning Azpilicueta. Torres fagnaði ekki á móti æskufélagi sínu.

Chelsea var því komið í lykilstöðu en aðeins í átta mínútur því Adrian Lopez jafnaði metin á 44. mínútu eftir að Juanfran sendi boltann fyrir markið í kjölfarið á fyrirgjöf Tiago.

Chelsea þurfti þá mark og knattspyrnustjórinn Jose Mourinho sendi Samuel Eto'o inn á völlinn. Það gekk þó ekki betur en það að Samuel Eto'o fékk dæmt á sig víti þegar hann braut á Diego Costa.

Diego Costa skoraði örugglega úr vítinu á 60. mínútu og Arda Turan gerði síðan endanlega út um leikinn þegar hann skoraði þriðja markið á 72. mínútu. Arda Turan fylgdi þá eftir eigin skalla.

Diego Simeone, þjálfari Atlético Madrid, vissi að sigurinn væri í höfn því hann tók a la Mourinho-fagn eftir allri hliðarlínunni.

Fernando Torres kemur Chelsea yfir. Adrian Lopez jafnar fyrir Atletico Madrid. Diego Costa kemur Atletico Madrid í 2-1 Arda Turan gerir út um þetta með þriðja markinu