VF: Friðrik Ingi þjálfar bæði Njarðvíkurliðin næsta vetur

Víkurfréttir hafa heimildir fyrir því að Friðrik Ingi Rúnarsson verði kynntur sem þjálfari karla- og kvennaliðs Njarðvíkur í körfubolta á næstu dögum en þetta kemur fram á heimasíðu VF.

Friðrik Ingi var búinn að vera framkvæmdastjóri KKÍ síðan að hann þjálfaði síðasta í úrvalsdeild karla veturinn 2005-06. Friðrik Ingi var þá þjálfari Grindavíkurliðsins eins og fjögur síðustu tímabil hans í þjálfun.

Friðrik Ingi þjálfaði síðast karlalið Njarðvíkur veturinn 1999-2000 en hann gerði Njarðvík að Íslandsmeisturum bæði 1991 og 1998. Grindavík varð síðan Íslandsmeistari undir hans stjórn vorið 1996.

Friðrik Ingi tekur við karlaliðinu af Einari Árna Jóhannssyni en karlaliðið er komið í oddaleik í undanúrslitaeinvígi sínu á móti Grindavík í úrslitakeppni Dominos-deildar karla.

Friðrik Ingi tekur við kvennaliðinu af Agnari Mar Gunnarssyni en Njarðvík féll úr Dominos-deild kvenna í vetur. Þetta verður ekki í fyrsta sinn sem Friðrik Ingi þjálfað kvennalið Njarðvíkur en hann þjálfaði liðið frá 1988 til 1990.

Friðrik Ingi verður enn einn þjálfarinn sem verður með bæði meistaraflokk karla og kvenna en svo var hátturinn á í vetur hjá Snæfelli, Keflavík og Val auk þess að Sverrir Þór Sverrisson mun þjálfa bæði meistaraflokksliðin hjá Grindavík næsta vetur.