Guardiola: Mín mistök ef Bayern kemst ekki áfram

Pep Guardiola, þjálfari Þýskalands- og Evrópumeistara Bayern München, talaði hreint út á blaðamannafundi fyrir leik liðsins gegn Manchester United í Meistaradeildinni í kvöld.

Þessir Evrópurisar mætast í seinni leik liðanna í átta liða úrslitum Meistaradeildarinnar á Allianz-vellinum klukkan 18.45 og er leikurinn í beinni útsendingu á Stöð 2 Sport HD.

Liðin skildu jöfn, 1-1, á Old Trafford í fyrri leiknum sem voru úrslit sem komu mörgum á óvart. Bayern er talið líklegra á heimavelli í kvöld en United hefur verið að sækja í sig veðrið undanfarnarvikur auk þess sem Þýskalandsmeistararnir verða án lykilmanna á borð við Bastians Schweinsteigers og Javi Martínez.

„Félagið ræður einfaldlega ekki við það ef við komumst ekki í úrslitaleikinn,“ sagði Guardiola en liðið vann Meistaradeildina í fyrra og komst í úrslitaleikinn fyrir tveimur árum.

„Það yrði gríðarlegt áfall að komast ekki einu sinni í undanúrslitin. Það yrðu mistök nýja stjórans. Þetta er lið sem vann þrennuna á síðasta tímabili og ég verð að vera í sömu stöðu,“ sagði Pep Guardiola.