Jesús gæti þjálfað Lakers

Það hefur ekkert gengið að fá Phil Jackson aftur í þjálfun en svo sannarlega hefur ekki vantað upp á eftirspurnina.

Jackson, sem hefur unnið ellefu NBA-titla, hefur engu að síður skoðun á því sem er að gerast í NBA-deildinni.

Hann var í ítarlegu viðtali við USA Today þar sem víða var komið við. Meðal annars var rætt um hans gamla félag Lakers sem er á botninum í Vesturdeildinni.

Hann var spurður út í það hver gæti eiginlega þjálfað þetta Lakers-lið?

"Ég held að Jesús gæti þjálfað þetta lið og gert það nokkuð vel. Fyrir utan Jesús þá koma líka Múhameð og Gandhi til greina," sagði Jackson léttur.