Arnór: Staðan á mér er ekki nógu góð

Það var skarð fyrir skildi hjá íslenska liðinu í kvöld að Arnór Atlason gat ekki spilað með vegna meiðsla. Hann komst ekki í gegnum upphitun og varð því að hvíla á bekknum.

"Staðan á mér er ekki nógu góð, annars hefði ég spilað. Ég hélt að ég væri tilbúinn en það var ekki möguleiki og lítið við því að gera," sagði Arnór.

Hann fer í frekari rannsóknir á morgun og þá kemur betur í ljós hver staðan sé á honum. Er hann hræddur um að hann sé búinn að spila sinn síðasta leik á mótinu?

"Auðvitað er maður hræddur en ég held ekki. Ég þarf bara að taka einn dag í einu og vona það besta."