NBA: Þriðji sigur Lakers-liðsins í röð - Brooklyn tapar og tapar

Los Angeles Lakers vann sinn þriðja leik í röð í NBA-deildinni í körfubolta í nótt og Oklahoma City Thunder og Los Angeles Clippers áttu ekki í miklum vandræðum í sínum leik. Dýrasta lið deildarinnar, Brooklyn Nets, tapaði hinsvegar sínum fimmta leik í röð.

Xavier Henry var með 12 af 21 stigi sínu í fjórða leikhluta þegar Los Angeles Laker vann 100-86 sigur á Sacramento Kings en þetta var þriðji sigur Lakers í röð. Pau Gasol skoraði 20 stig og tók 10 fráköst og Steve Blake var með 12 stoðsendingar og 9 stig. Greivis Vasquez skoraði 20 stig fyrir Kings og DeMarcus Cousins bætti við 17 stigum, 8 fráköstum og 7 stoðsendingum.

Los Angeles Clippers átti ekki í miklum vandræðum með lið Chicago Bulls sem lék án Derrick Rose sem er á leið í hnéaðgerð. Clippers-liðið vann leikinn 121-81. Jared Dudley skoraði 21 stig, Chris Paul var með 16 stig og 17 stoðsendingar og J.J. Redick var með 19 stig. Blake Griffin bætti síðan við 15 stigum og 12 fráköstum í sjöunda sigri Clippers í níu leikjum. Luol Deng skoraði 22 stig fyrir Chicago Bulls.

Kevin Durant skoraði 19 stig og Serge Ibaka var með 17 stig og 11 fráköst þegar Oklahoma City Thunder vann 95-73 sigur á Utah Jazz og það án leikstjórnandans Russell Westbrook sem er meiddur. Þetta var fimmti sigur Oklahoma City í röð. Enes Kanter og Rudy Gobert voru stigahæstir hjá Utah með 10 stig en liðið tapaði þarna sínum sjötta leik í röð og hefur aðeins unnið 1 af 15 leikjum tímabilsins til þessa.

Brooklyn Nets, dýrasta lið NBA-deildarinnar, tapaði fimmta leiknum í röð þegar liðið lá 109-97 á móti Detroit Pistons. Brooklyn Nets hefur aðeins unnið 3 af 13 fyrstu leikjum sínum í vetur. Rodney Stuckey kom með 27 stig inn af bekknum fyrir Detroit og Greg Monroe var með 18 stig og 11 fráköst. Joe Johnson skoraði 34 stig fyrir Brooklyn Nets en hann hitti úr 8 af 10 þriggja stiga skotum sínum í leiknum. Paul Pierce (19 stig) og Kevin Garnett (4 stig) hitti hinsvegar aðeins úr 7 af 22 skotum sínum saman. Brook Lopez, Deron Williams, Andrei Kirilenko og Jason Terry eru allir frá vegna meiðsla.

Úrslit leikja í NBA-deildinni í nótt:

Brooklyn Nets - Detroit Pistons 97-109

Los Angeles Clippers - Chicago Bulls 121-82

Orlando Magic - Phoenix Suns 96-104

Oklahoma City Thunder - Utah Jazz 95-73

Los Angeles - Sacramento Kings 100-86