Iguodala skoraði ótrúlega sigurkörfu gegn Oklahoma

Aðeins tveir leikir fóru fram í NBA-deildinni í körfubolta í nótt. Boðið var upp á gríðarlega spennu í leik Golden State og Oklahoma.

Andre Iguodala skoraði ótrúlega flautukörfu fyrir Golden State sem vann leikinn með einu stigi. Russell Westbrook kom Oklahoma yfir með þriggja stiga körfu er 2,3 sekúndur voru eftir af leiknum.

Sá tími dugði heimamönnum til þess að skora sigurkörfuna og ætlaði allt um koll að keyra í höllinni.

Iguodala skoraði 14 stig og tók 9 fráköst. Klay Thompson skoraði 27 stig og Stephen Curry 22.

Westbrook stigahæstur hjá Oklahoma með 31 stig, 9 fráköst og 5 stoðsendingar. Serge Ibaka skoraði 27 og Kevin Durant 20.

Úrslit:

NY Knicks-Houston  106-109

Golden State-Oklahoma  116-115