Robben: Spiluðum stórkostlega fyrstu 70 mínúturnar

Arjen Robben og félagar í Bayern Munchen fóru illa með Manchester City á Etihad-leikvanginum í kvöld og hollenski vængmaðurinn var óviðráðanlegur á hægri kantinum í 3-1 sigri. Bayern hefði getað skorað miklu fleiri mörk þegar liðið yfirspilaði City-menn fram eftir leik en undir lok leiksins náði enska liðið aðeins að bíta frá sér.

„Við spiluðum stórkostlegan fótbolta fyrstu 70 mínútur leiksins. Við bjuggumst heldur betur ekki við slíkum yfirburðum á móti einu sterkasta liðinu í Evrópu," sagði Arjen Robben.

„Okkar lið á hrós skilið fyrir þessa frammistöðu en við áttum von á miklu meiru frá City-liðinu. Við gáfum þeim ekkert pláss í kvöld, pressuðum þá allan völlinn og þeir voru bara í löngum boltum. Við nýttum okkur það síðan vel þegar þeir gáfu okkur of mikið pláss til að vinna með," sagði Arjen Robben.

Arjen Robben skoraði eitt marka Bayern en var óhræddur að láta vaða á markið í leiknum og hefði því getað skorað fleiri mörk.