Jason Kidd ráðinn þjálfari Brooklyn Nets

Jason Kidd var í gærkvöldi ráðinn þjálfari Brooklyn Nets en hann lagði skóna á hilluna í síðustu viku. Kidd lék í 19 ár í NBA deildinni og er talinn einn besti leikstjórnandi deildarinnar frá stofnun hennar.

Jason Kidd verður þriðji þjálfari liðsins á innan við ári en Avery Johnson var rekinn frá félaginu í desember. Þá tók við stjórninni P.J. Carlesimo sem hætti með liðið þegar það féll úr leik í fyrir Chicago Bulls í úrslitakeppninni.

Kidd lék með New Jersey Nets á árunum 2001-08 en félaginu var síðar breytt í Brooklyn Nets.

Hinn moldríki Mikhail Prokhorov er eigandi félagsins en hann hefur alltaf ætlað sér stóra hluti með liðið.