Börn Iverson komin aftur til móður sinnar

Körfuboltastjarnan fyrrverandi, Allen Iverson, neitar því að hafa rænt börnunum sínum sem nú eru komin aftur í umsjá móður sinnar, Tawanna.

Hún kærði Allen á dögunum fyrir að skila ekki börnunum á réttum tíma en Tawanna hefur fullt forræði yfir börnunum fimm. Málið fór fyrir dómstóla í síðustu viku og eftir það fóru börnin, sem eru þriggja til sextán ára, aftur til móður sinnar.

Er málið fór fyrir dómara kom fram að Tawanna hafði fullan aðgang að börnunum og vissi nákvæmlega hvar þau væru. Hún hefði aftur á móti ekki nennt að keyra 45 mínútna leið til þess að ná í þau.

Allen segist vera að vinna í því að vera meira með börnunum sínum og þessi síðasta heimsókn hafi verið hluti af því. Dómarinn tók skýringar Allen til greina og Allen slapp því við fangelsisvist.

"Fólk segir að ég hafi stolið krökkunum mínum og það er ótrúlegt hverju fólk er til í að trúa. Ég hef aldrei fengið sanngjarna meðferð," sagði Allen Iverson við fjölmiðla.