Disneyferð forstjóra Iceland kostar nær hálfan milljarð í skatt

Boðsferð Malcolm Walker forstjóra Iceland keðjunnar á Bretlandseyjum til Disneyland í Flórída ætlar að verða honum dýrkeypt. Breski skatturinn hefur krafið hann um 2,5 milljónir punda eða tæplega 470 milljónir kr.

Fjallað er um málið á vefsíðunni walesonline. Forsaga málsins er sú að árið 2009 bauð Walker um 800 verslunarstjórum og öðrum yfirmönnum Iceland til Disneyland. Ferðin kostaði um 4 milljónir punda eða um 5.000 pund á mann. Markmið ferðarinnar var að veita fyrrgreindum yfirmönnum innsýn í þjónustuna sem Disneyland veitir sínum viðskiptavinum.

Breski skatturinn telur að ferðin hafi verið bónus fyrir yfirmennina og það eigi að skattaleggja hana sem slíka. Walker segir aftur á móti að um fjárfestingu hafi verið að ræða. Hann viðurkennir hinsvegar að boðsferðin hafi að hluta til verið verðlaun til yfirmanna Iceland í kjölfar þess að keðjan átti gott ár að baki.

Breski skatturinn og Walker eiga nú í deilu um hvort honum beri að greiða fyrrgreindan skatt af boðsferðinni eða ekki. Skatturinn segir að ekki eigi að gefa neinn afslátt í þessum efnum.