NBA: Charlotte stöðvaði sigurgöngu Boston

Charlotte Bobcats endaði sjö leikja sigurgöngu Boston Celtics í NBA-deildinni í körfubolta í nótt, San Antonio Spurs vann Chicago Bulls án þriggja stærstu stjörnuleikmanna liðsins, Washington Wizards vann sinn fjórða leik í röð, Los Angeles Clippers vann Philadelphia og Indiana Pacers tapaði í framlengingu í öðrum heimaleiknum í röð.

Byron Mullens skoraði 25 stig og tók 18 fráköst þegar Charlotte Bobcats vann Boston Celtics 94-91 en Boston-liðið var búið að vinna sjö leiki í röð og alla leiki sína síðan að Rajon Rondo sleit krossband. Ramon Sessions var með 19 stig og lykilkörfu í lokin og Kemba Walker bætti við 18 stigum, 6 fráköstum og 6 stoðsendingum. Jeff Green var stigahæstur hjá Boston með 18 stig og Kevin Garnett var með 16 stig og 13 fráköst. Paul Pierce var með 13 stig, 8 fráköst og 8 stoðsendingar.

San Antonio Spurs, besta lið NBA-deildarinnar, lék án þeirra Tony Parker, Tim Duncan og Manu Ginobili í nótt en það kom ekki að sök þegar liðið vann 103-89 útisigur á Chicago Bulls. Kawhi Leonard skoraði 26 stig og Danny Green var með 18 stig. Gary Neal og Tiago Splitter skoruðu báðir 16 stig fyrir Spurs og Nando De Colo sem kom inn í byrjunarliðið fyrir Parker var með 9 stig og 7 stoðsendingar. Nate Robinson skoraði mest fyrir Chicago eða 20 stig og Richard Hamilton var með 16 stig.

Nýliðinn Brandon Beal skoraði 28 stig þegar Washington Wizards vann 102-90 útisigur á Milwaukee Bucks. Þetta var fjórði sigur Wizards-liðsins í röð en liðið hefur unnið 10 af 17 leikjum sínum síðan að John Wall kom til baka eftir meiðsli. Wall var með 14 stig og 10 stoðsendingar í nótt en Nene Hilario skoraði 21 stig og tók 13 fráköst. Monta Ellis var með 24 stig, 7 fráköst og 8 stoðsendingar hjá Milwaukee sem tapaði sínum fjórða leik í röð og þeim sjötta af síðustu sjö. Brandon Jennings klikkaði á 14 af 17 skotum sínum í leiknum og var bara með 7 stig.

Chris Paul var með 21 stig og 11 stoðsendingar þegar Los Angeles Clippers vann Philadelphia 76ers 107-90. Blake Griffin og Jamal Crawford skoruðu báðir 20 stig fyrir Clippers-liðið en liðið lék án bæði Chauncey Billups og Caron Butler. Nick Young skoraði mest fyrir Philadelphia eða 29 stig.

Brook Lopez skoraði 25 stig þegar Brooklyn Nets vann Indiana Pacers 89-84 í framlengdum leik í Indianapolis og það þrátt fyrir að spila án Deron Williams. Þetta var annað tap Indiana í röð á heimavelli í framlengingu en George Hill var stigahæstur hjá liðinu með 22 stig. Brooklyn skoraði fjögur síðustu stig leiksins til þess að tryggja sér framlengingu og hóf hana síðan á 9-3 spretti.

Úrslit í öllum leikjum í NBA-deildinni í nótt:

Philadelphia 76ers - Los Angeles Clippers 90-107

Charlotte Bobcats - Boston Celtics 94-91

Cleveland Cavaliers - Minnesota Timberwolves 92-100

Indiana Pacers - Brooklyn Nets 84-89 (framlengt)

Detroit Pistons - New Orleans Hornets 86-105

Chicago Bulls - San Antonio Spurs 89-103

Milwaukee Bucks - Washington Wizards 90-102

Dallas Mavericks - Atlanta Hawks 101-105