NBA: Boston vann Chicago - Carmelo meiddist

Boston Celtics vann baráttusigur á Chicago Bulls í NBA-deildinni í körfubolta í nótt en þetta var áttundi sigur liðsins í níu leikjum síðan að liðið missti leikstjórnandann Rajon Rondo. Los Angeles Clippers er búið að endurheimta Chris Paul og er um leið búið að hefja nýja sigurgöngu en liðið vann sinn þriðja leik í röð í nótt. Tim Duncan, Tony Parker og Manu Ginobili voru allir með á ný þegar San Antonio Spurs vann dramatískan sigur.

Brandon Bass skoraði 14 stig og Kevin Garnett skoraði 8 af 12 stigum sínum í fjórða leikhlutanum þegar Boston Celtics vann 71-69 sigur á Chicago Bulls. Marco Belinelli skoraði mest fyrir Bulls-liðið eða 12 stig og Joakim Noah skoraði 10 stig og tók 16 fráköst en Chicago hefur nú tapað fimm af síðustu sjö leikjum sínum.

Caron Butler skoraði 17 af 19 stigum sínum í fyrsta leikhluta þegar Los Angeles Clippers vann 106-96 sigur á Houston Rockets. Þetta var þriðji sigur Clippers-liðsins í röð. Blake Griffin var með 20 stig og 11 fráköst, Chauncey Billups skoraði 19 stig, Jamal Crawford var með 13 stig og Chris Paul bætti við 10 stigum og 11 stoðsendingum. Chandler Parsons var með 17 stig fyrir Houston en liðið lék án James Harden.

Toronto Raptors er á góðu róli eftir fjórða sigur sinn í röð en liðið vann 92-88 sigur á New York Knicks í Madison Square Garden í nótt. Carmelo Anthony meiddist í leiknum og gæti misst af Sjörnuleiknum. Alan Anderson skoraði 26 stig fyrir Toronto og DeMar DeRozan var með 20 stig. Anthony skoraði bara 12 stig en hann hitti aðeins úr 5 af 24 skotum sínum.

Kawhi Leonard tryggði San Antonio Spurs 96-95 sigur á Cleveland Cavaliers með því að skora þriggja stiga körfu 2,9 sekúndum fyrir leikslok. Spurs-liðið hefur nú unnið 14 af síðustu 15 leikjum sínum. Tim Duncan, Tony Parker og Manu Ginobili voru allir saman í fyrsta sinn síðan 13. janúar. Tony Parker var með 24 stig og 7 stoðsendingar, Duncan skoraði 13 stig og Ginobili 5 stig og 6 stoðsendingar á tæpum tíu mínútum. Dion Waiters skoraði 20 stig fyrir Cleveland en Kyrie Irving hitti aðeins úr 2 af 15 skotum sínum í leiknum.

Joe Johnson skoraði 26 stig og fimm þrista þegar Brooklyn Nets vann 119-108 sigur á Denver Nuggets. C.J Watson var með 25 stig og setti líka niður fimm þrista. Brook Lopez skoraði 23 stig fyrir Brooklyn en Ty Lawson var með 26 stig og 9 stoðsendingar hjá Denver sem tapaði sínum þriðja leik í röð.

Öll úrslitin í NBA-deildinni í nótt:

Orlando Magic - Atlanta Hawks 76-108

Cleveland Cavaliers - San Antonio Spurs 95-96

Indiana Pacers - Charlotte Bobcats 101-77

Boston Celtics - Chicago Bulls 71-69

Brooklyn Nets - Denver Nuggets 119-108

New York Knicks - Toronto Raptors 88-92

Detroit Pistons - Washington Wizards 96-85

Milwaukee Bucks - Philadelphia 76ers 94-92

New Orleans Hornets - Portland Trail Blazers 99-63

Minnesota Timberwolves - Utah Jazz 93-97

Dallas Mavericks - Sacramento Kings 123-100

Los Angeles Clippers - Houston Rockets 106-96