Betra líkamlegt ásigkomulag skortir

Íslenska kvennalandsliðið í handknattleik mætir Tékkum í umspilsleikjum um sæti á heimsmeistaramótinu næsta sumar. Landsliðsþjálfarinn segir að bæta þurfi frammistöðuna frá því á EM í Serbíu til að eiga möguleika og að stelpurnar þurfi að vera í betra standi.

„Tékkar eru með gríðarlega sterkt lið. Þær spiluðu frábærlega á EM og unnu sem dæmi Úkraínu, lið sem við töpuðum í tvígang fyrir í riðlakeppni EM. Þær töpuðu naumlega bæði gegn Noregi og Danmörku. Þá leiki sá ég og þær voru að spila virkilega vel," segir Ágúst Jóhannsson, þjálfari kvennalandsliðs Íslands.

Um liðna helgi varð ljóst að Ísland mætir Tékkum í umspilsleikjum um sæti á heimsmeistaramótinu í Serbíu. Leikirnir fara fram í júní en lokakeppnin í desember.

Ísland hefði ekki getað fengið betri mótherja í drættinum og Ágúst játar því að ekkert lið hafi verið ofar á óskalistanum. Tékkar og Rúmenar hafi komið upp í kollinn en allir andstæðingarnir séu sterkir.

„Tékkar eru mjög sterkt lið. Okkar lið þarf að vera heilsteyptara í þessum leikjum og í betra líkamlegu ásigkomulagi en í Serbíu. Það er eitthvað sem leikmenn þurfa að vinna í og ég kem til með að ræða við hópinn í rólegheitunum," segir Ágúst og telur Íslendinga eiga helmingsmöguleika gegn Tékkum svo framarlega sem stelpurnar verði í betra standi.

Ágúst nefnir vítaköst sem dæmi þegar hann er spurður hvernig Ísland standi illa hvað líkamlega getu varðar.

„Við fáum á okkur 21 vítakast í þremur leikjum á meðan við sækjum ellefu. Það er bara einn þáttur. Þegar okkar leikmenn sækja í fintur, fara í árásir einn gegn einum þá fáum við fríköst. Við klárum ekki brotin okkar megin nógu vel og fáum á okkur vítaköst," segir Ágúst en gerir sér grein fyrir því að líkamlegur styrkur verði ekki bættur yfir nóttu.

„Þetta er einn þáttur í þessu sem við þurfum að vinna í hægt og rólega og markvisst á næstu árum. Þetta er ekkert sem breytist á næstu mánuðum."

Ágúst segir vissulega vonbrigði að íslenska liðið hafi ekki komist upp úr riðli sínum á Evrópumótinu í Serbíu sem lauk um helgina. Markmiðið hafi verið háleitt en spilamennskan hafi þó valdið honum vonbrigðum ef frá er talið tapið gegn Rúmeníu sem hafi verið góður leikur af hálfu íslenska liðsins.

„Þess ber þó að geta að Svartfjallaland vann mótið og Rússland varð í sjötta sæti. Þetta eru gríðarlega sterkar þjóðir, það segir sig sjálft, en að sama skapi vil ég meina að við getum betur og eigum að geta sýnt betri spilamennsku en við gerðum. Varnarleikurinn var almennt nokkurn veginn á pari en hraðaupphlaup og sóknarleikur er eitthvað sem við þurfum að vinna með," segir Ágúst sem vill að fleiri leikmenn taki meiri ábyrgð í sóknarleiknum.

Vinstri skyttur íslenska liðsins, þær Stella Sigurðardóttir, Ramune Pekarskyte og Hrafnhildur Ósk Skúladóttir, náðu sér engan veginn á strik á mótinu.

„Það var svo sem sama hver var að spila þar, þær voru því miður ekki að ná sér á strik. Allar reyndu að sjálfsögðu 100 prósent, það vantaði ekkert upp á það, en svona er þetta stundum. Það náði sér enginn á strik þar og það vantaðisárlegamörk af vinstri vængnum. Það segir sig sjálft að lykilmenn þar voru ekki að skora þau mörk sem þeir eru vanir að gera," segir Ágúst sem var afar ánægður með framlag Rutar Jónsdóttur í stöðu hægri skyttu.

„Rut spilaði frábærlega og þetta var hennar besta stórmót," segir Ágúst. Næst á dagskrá eru æfingaleikir í mars áður en hópurinn kemur saman í maí fyrir leikina gegn Tékkum í júní.

„Við höfum góðan tíma fyrir leikina gegn Tékkum. Við vinnum í þessum hlutum, reynum að bæta okkur og vera eins tilbúin og við getum fyrir Tékkaleikina. Það verða gríðarlega erfiðir leikir og þar þurfum við að spila betur en við gerðum í Serbíu."