Framherji Celtic: Við getum unnið Barcelona

Þeir eru ekki margir sem búast við því að skoska liðið Celtic geri einhvern usla á Camp Nou í Barcelona í kvöld er liðið spilar þar í Meistaradeildinni. Leikmenn liðsins eru þó nokkuð borubrattir.

"Ég tel okkur eiga möguleika. Það eru meiðsli hjá þeim sem gefa okkur möguleika. Leikurinn er sýndur um allan heim og það veitir okkur hvatningu," sagði framherjinn Miku hjá Celtic en hann lék áður með Getafe á Spáni.

"Ég hef unnið, tapað og gert jafntefli á þessum velli. Þetta verður mjög erfitt enda er Barcelona besta lið heims."

Þjálfari liðsins, Neil Lennon, vonast eftir því að hetjur muni fæðast í Barcelona í kvöld.

"Við höfum engu að tapa og allt getur gerst í fótboltaleik. Við erum ekki hér sem túristar og ætlum að selja okkur dýrt," sagði Lennon.