Ray Allen fer til Miami Heat

Ray Allen ætlar að fara frá Boston Celtic og ganga til liðs við NBA-meistarana í Miami Heat. Hann mun taka á sig launalækkun til að freista þess að vinna annan NBA-meistaratitil.

Miami gat boðið Allen þrjár milljónir dollara í árslaun sem þykir ekki mjög mikið í NBA-deildinni. Hann hefði getað fengið tvöfalt hærri laun hefði hann kosið að vera áfram hjá Boston, eftir því sem kemur fram í fjölmiðlum ytra.

Allen var laus allra mála hjá Boston og því frjálst að semja við annað lið. Hann hafði fundað með forráðamönnum Miami í gær og tilkynnti þeim að hann ætlaði að ganga að samningstilboði þeirra. Micky Arison, eigandi Miami, hefur staðfest þetta sem og umboðsmaður Allen.

Miami varð meistari í NBA-deildinni í síðasta mánuði eftir sigur á Oklahoma City í úrslitaeinvíginu.