Játuðu aðild að Michelsen-ráninu en neita að hafa skipu­lagt það

Þeir Grzegorz Marcin Nowak og Pawel Jerzy Podburaczynski, játuðu báðir aðild að úraráninu í Michelsen síðasta haust í Héraðsdómi Reykjavíkur í morgun. Þá fóru mennirnir vopnaðir leikfangabyssum inn í úrabúðina og stálu úrum fyrir um 50 milljónir króna.

Báðir mennirnir neita hinsvegar að hafa skipulagt ránið og fjármagnað. Þá neita þeir að hafa stolið fjórum bílum sem síðar voru notaðir til þess að komast undan í ráninu.

Alls eru fjórir menn grunaðir um aðild að málinu. Þegar hefur einn mannanna, Marcin Tomsz Lech, verið dæmdur fyrir aðild sína að ráninu. Hann var dæmdur í fimm ára fangelsi og til þess að greiða 14 milljóna króna kröfu VÍS tryggingafélagsins

Mennirnir eru allir frá Póllandi og er talið að þeir hafi komið gagngert til Íslands til þess að ræna verslunina. Þeir hafa engin tengsl hér á landi.

Eftir ránið komust allir úr landi nema Lech, sem varð eftir og átti að koma þýfinu úr landi með Norrænu. Hann var þó handtekinn áður og tókst lögreglu því að leggja hald á þýfið.

Hinir tveir voru í Póllandi en þar sem enginn framsalssamningur er í gildi var ekki hægt að koma höndum yfir þá. Mennirnir voru hinsvegar handteknir síðar í Sviss, síðan voru þeir framseldir til Íslands.

Mennirnir tóku ekki afstöðu til bótakröfunnar en VÍS krefst 14 millljóna af þeim auk þess sem starfsfólk búðarinnar fara fram á 24 milljónir í miskabætur.

Aðalmeðferð málsins fer fram 13. júní næstkomandi.