NBA: LeBron með 41 stig í sigri Miami Heat

LeBron James var öflugur þegar Miami Heat tryggði sér sæti í úrslitakeppni NBA-deildarinnar í körfubolta með sigri á Philadelphia 76ers í nótt. Kobe Bryant skoraði mikilvægan þrist í blálokin á sigri Los Angeles Lakers á New Jersey Nets, Orlando Magic tapaði fjórða leiknum í röð og San Antonio Spurs vann áttunda leikinn sinn í röð.

LeBron James skoraði 41 stig og Mario Chalmers var með 19 stig þegar Miami Heat vann 99-93 sigur á Philadelphia 76ers en þetta var sextándi heimasigur liðsins í röð. James skoraði meðal annars 14 stig í röð hjá Miami í fjórða leikhlutanum en liðið lék án Dwyane Wade sem fékk högg á hné í leiknum á undan. Evan Turner skoraði 26 stig fyrir Philadelphia.

Kobe Bryant var með 24 stig og skoraði mikilvægan þrist í blálokin þegar Los Angeles Lakers vann 91-87 heimasigur á New Jersey Nets. Pau Gasol var með 22 stig og 12 fráköst og Ramon Sessions skoraði 19 stig og gaf 11 stoðsendingar. Lakers er búið að vinna 11 af síðustu 15 leikjum. Deron Williams skoraði 20 stig fyrir Nets, Gerald Wallace skoraði 19 stig og Kris Humphries var með 18 stig og 15 fráköst.

Danny Granger skoraði 14 af 27 stigum sínum í fjórða leikhluta þegar Indiana Pacers vann 112-104 sigur á New York Knicks. Paul George skoraði 18 stig fyrir Indiana en það dugði ekki New York að Carmelo Anthony var með 39 stig og 10 fráköst.

Greg Monroe var með 22 stig og 11 fráköst þegar Detroit Pistons vann 102-95 sigur á Orlando Magic en Orlando lék án þeirra Dwight Howard, Jameer Nelson og Ryan Anderson og er nú búið að tapa fjórum leikjum í röð. Ben Gordon var með 18 stig hjá Detroit en Glen Davis skoraði mest fyrir Orlando eða 31 stig.

Danny Green og Tony Parker voru báðir með 19 stig fyrir San Antonio Spurs sem vann léttan sigur á Cleveland Cavaliers 125-90. Cleveland lét Danny Green einmitt fara fyrr á þessu tímabili. San Antonio er nú búið að vinna átta leiki í röð en Cleveland var á sama tíma að tapa sínum áttunda leik í röð.

Úrslit allra leikja í NBA-deildinni í nótt:

Toronto Raptors - Charlotte Bobcats 92-87

Cleveland Cavaliers - San Antonio Spurs 90-125

Indiana Pacers - New York Knicks 112-104

Miami Heat - Philadelphia 76Ers 99-93

Detroit Pistons - Orlando Magic 102-95

Memphis Grizzlies - Golden State Warriors 98-94

Sacramento Kings - Phoenix Suns 100-109

Los Angeles Lakers - New Jersey Nets 91-87

Staðan í NBA-deildinni:Á nba.com eða yahoo.com