Stuðningsmenn Mavs baula á Odom | Fékk knús frá Kobe

Það hefur ekkert gengið hjá Lamar Odom síðan hann gekk í raðir Dallas Mavericks frá LA Lakers. Stuðningsmenn Mavs hafa algjörlega snúist gegn honum og baula nú á hann við hvert tækifæri á heimavelli.

Þessi neikvæðni í garð Odom fór verulega í taugarnar á Kobe Bryant, fyrrum liðsfélaga Odom hjá Lakers, er liðin mættust í nótt.

Eftir leikinn tók Kobe þéttingsfast utan um félaga sinn og hvíslaði að honum hvatningarorðum. Hann reiddist síðan er blaðamenn spurðu hann um atvikið eftir leikinn.

"Það kemur ykkur nákvæmlega ekkert við hvað ég sagði," sagði hvassyrtur Kobe.

Eiginkona Odom, raunveruleikastjarnan Khloe Kardashian, var á meðal áhorfenda og sætti sig illa við allt baulið.

Hún notaði Twitter til þess að lýsa vonbrigðum sínum. "Þessir áhorfendur þurfa að fara að átta sig á með hverjum þeir halda," sagði Kardashian meðal annars.