Lin verður áfram aðalleikstjórnandi Knicks

Mike D'Antoni, þjálfari NY Knicks, segist ætla að halda sig við Jeremy Lin sem aðalleikstjórnanda liðsins og Baron Davis verður því að sætta sig við að byrja á bekknum.

D'Antoni var einnig spurður að því hvort hann myndi ekki freistast til að nota Davis í leikjum þegar allt væri undir.

"Við verðum að sjá til. Ég er mjög ánægður með Jeremy. Hann finnur alltaf leið til þess að vera jákvæður og var það líka í tapinu gegn Boston," sagði þjálfarinn.

"Hann mun klára leiki sem og byrja þá. Svo verðum við bara að sjá hvernig leikirnir þróast. Ég er samt mjög sáttur við hann og treysti honum."

Þjálfarinn hefur einnig ekki útilokað að vera með þá báða í byrjunarliðinu en Lin yrði þó leikstjórnandi.