Réttlætinu fullnægt ef Fabregas kemur til Barcelona

Joan Laporta, fyrrum forseti Barcelona, segir að réttlætinu verði fullnægt ef Cesc Fabregas gengur í raðir félagsins í framtíðinni.

Laporta reyndi að kaupa Fabregas í sinni forsetatíð en það tókst ekki. Fabregas er enn á mála hjá Arsenal en þessi lið mætast einmitt í 16-liða úrslitum Meistaradeildar Evrópu í kvöld.

„Englendingarnir koma hingað og reyna að „veiða" leikmenn. Þeir komu hingað til að fá Gerard Pique og gerðu það líka í tilfelli Cesc. Við viljum fá þessa leikmenn aftur og er það spurning um réttlæti."

Pique fór ungur frá Barcelona til Manchester United en er nú kominn aftur til Katalóníu.

„Ég hefði viljað fá Cesc aftur alveg eins og okkur tókst að fá Pique. Hann yfirgaf Manchester United og vildi koma hingað. Þetta eru leikmenn sem voru mótaðir hér."

„Cesc er frábær leikmaður og ég vil fá hann aftur. En það er ekki nauðsynlegt að fá hann strax vegna þess að við erum með leikmenn eins og Xavi, Iniesta, Busquets og Keita. Ég held að hann gæti komið á næsta tímabili eða þarnæsta."

Arsene Wenger, hefur svarað Laporta fullum hálsi.

„Þetta er hluti af leiknum," sagði Wenger. „Hvaðan fá þeir leikmenn sína. Hvaðan kemur Lionel Messi? Barcelona? Hvað var hann gamall þegar Barcelona fékk hann? Hann var tólf ára," sagði Wenger en fram að því æfði Messi með Newell's Old Boys í Argentínu.

„Það er ekki ástæða fyrir neinum biturleika. Við brutum engin lög. Allt var löglegt og við berum virðingu fyrir reglunum. Þeir gætu komið og tekið okkar leikmenn og við verðum líka að kyngja því."