Strákurinn hans Ronaldo þreyttur á blaðrinu í pabba sínum

Brasilíski fótboltamaðurinn Ronaldo lagði skóna á hilluna á mánudaginn þar sem þessi fyrrum besti knattspyrnumaður heims gat ekki varist tárum þegar hann kvaddi boltann eftir átján litrík ár.

Ronaldo kom með tvo syni sína á blaðamannafundinn, Ronaldo sem er orðinn tíu ára og Alex sem er fimm ára. Sá yngri var þó fljótur að þreytast á blaðinu hjá pabba sínum þegar áhugasamir blaðamenn spurðu hann spjörunum úr.

Alex tók sig til og hvíldi sig undir borðinu á meðan að Ronaldo fór yfir feril sinn. Ronaldo grínaðist að þetta hafi hann ekki haft í huga en kannski væri þetta eftir allt saman bara viðeigandi.

Í það minnst náðist þessi mynd hér fyrir ofan þar sem Alex hvílir sig undir borðinu en getur þó ekki varist forvitninni að skoða betur fjölda ljósmyndara og blaðamanna sem sátu um hvert orð hjá pabba hans.