David Stern við leikmenn: Samþykkið tilboð okkar fyrir miðvikudag

David Stern, yfirmaður NBA-deildarinnar, hefur sett leikmönnum afarkosti í deilu sinni við eigendur félaganna. Á borðinu sé tilboð sem stendur til miðvikudags. Betra tilboð standi leikmönnum ekki til boða.

Talsmenn leikmannasamtakanna og eigendanna funduðu í átta klukkustundir í nótt án þess að ná sáttum. Fjórar vikur eru síðan tímabilið vestanhafs átti að hefjast og því ljóst að leikmenn og eigendur verða af heilmiklum fjármunum með hverjum deginum sem líður.

Samkvæmt tilboði Stern fá leikmenn á bilinu 49-51 prósent af tekjum deildarinnar. Í fyrri samningi leikmanna við eigendur félaganna, sem rann út í júní, fengu leikmenn 57 prósent af tekjunum en félögin 43 prósent. Eigendur kvarta hins vegar sáran yfir sínum hlut en voru 22 af 30 liðum deildarinnar rekin með tapi á síðasta tímabili.

Jeffrey Kessler, lögfræðingur leikmannasamtakanna, segir að leikmenn muni ekki gefa eftir þrátt fyrir hótanir Stern.

„Leikmenn vilja spila, þeir vilja að tímabilið fari af stað en þeir eru ekki tilbúnir að fórna hagsmunum leikmanna framtíðarinnar í NBA-deildinni vegna hótanna," sagði Kessler.

Stern er hins vegar harður á því að leikmenn muni tapa á því að ganga ekki að samningnum sem sé á borðinu.