Szczesny. Ég átti ekki möguleika í þetta skot

Wojciech Szczesny, markvörður Arsenal, var nokkuð sáttur við stigið gegn Dortmund á útivelli í kvöld. Arsenal var ekki fjarri því að ná sigri en þrumufleygur Perisic undir lokin bjargaði stigi fyrir heimamenn.

"Það lá ansi mikið á okkur í seinni hálfleik. Stundum falla hlutirnir með manni og stundum ekki. Ég hreyfði mig ekki í þessu skoti. Ég átti ekki möguleika að verja," sagði Szczesny en skot Perisic var magnað og líklega hefði enginn markvörður varið það.

"Við sýndum gegn Swansea að við getum spilað fótbolta og unnið leiki. Þetta var erfiður leikur en við verðum að vera sáttir við stigið."