Murdoch afþakkaði 700 milljónir vegna símhleranahneykslis

James Murdoch, forstjóri fjölmiðlafyrirtækisins News International, afþakkaði 6 milljóna dala launabónus frá fyrirtækinu vegna símhleranahneyksliss sem skók fyrirtækið í vor. Upphæðin sem James afþakkaði nemur um 690 milljónum króna. Rupert, pabbi James, fékk 12.5 milljóna dala bónus, eða röskar 1400 milljónir króna, þegar ársuppgjör News Corp var birt á dögunum.

Árslaun James hækkuðu reyndar um 74% og námu tæpum tveimur milljörðum króna þannig að hann ætti ekkert að vera á flæðaskeri staddur. En hann sagði að það eina rétta í stöðunni væri að hafna bónusnum. Umrætt símhleranahneyksli varð til þess að útgáfu News of the World, sem er eitt af þeim blöðum sem News International gaf út, var hætt.