Arenas sektaður fyrir ummæli á Twitter

Gilbert Arenas leikmaður Orlando Magic var í síðustu viku sektaður af NBA deildinni fyrir ummæli sín á Twitter. Hann baðst afsökunar á ummælunum á sömu samskiptasíðu og óskaði eftir reglum NBA deildarinnar um leyfilega hegðun á samskiptasíðum.

Forsvarsmenn NBA-deildarinnar hafa staðfest að Arenas var sektaður en fjölmiðlar fengu veður af sektinni í gegnum aðra Twitter-færslu kappans. Þeir neita þó að gefa upp hve há sektin var.

Þetta er ekki í fyrsta sinn sem Arenas, sem hefur þrívegis verið valinn í stjörnulið deildarinnar, kemst í kast við reglur NBA deildarinnar. Tímabilið 2009-2010 var Arenas dæmdur í leikbann fyrir að geyma óhlaðnar skammbyssur í búningsklefa Washington Wizards.