Setti stjörnuleikmann sinn í skammarkrókinn

Russell Westbrook, er leikstjórnandi og annar stjörnuleikmanna NBA-liðsins Oklahoma City Thunder í NBA-deildinni í körfubolta. Hann fékk þó óvenjulítið að vera í nótt þegar liðið jafnaði einvígi sitt í 1-1 á móti Dallas Mavericks í úrslitum Vesturdeildarinnar.

Scott Brooks, þjálfari Oklahoma City, tók mikla áhættu með því að nota Russell Westbrook ekkert í fjórða leikhlutanum en liðið vann engu að síður mikilvægan 106-100 útisigur í þessum leik. Bekkur liðsins var frábær og átti mestan þátt í sigrinum.

Westbrook spilaði sína síðustu mínútu í lok þriðja leikhlutans og lét þjálfara sinn heyra það þegar hann tók hann útaf eftir klaufalegan tapaðan bolta. Westbrook hélt áfram að kvarta í sætinu sínu þar til aðstoðarþjálfarinn Maurice Cheeks kom til hans og róaði hann niður.

Brooks ákvað hinsvegar að láta vara-leikstjórnandann Eric Maynor klára leikinn og þegar Russell Westbrook var spurður út í þetta eftir leikinn sagði hann að það hafi ekki verið erfitt að horfa á leikinn af bekknum.

„Ekki þegar við erum að vinna. Ég er góður, ég sit bara á bekknum og bíð eftir að þjálfarinn kalli nafnið mitt," sagði Russell Westbrook og Brooks vildi ekki meina að þetta hafi verið einhver refsing.

„Mér fannst Eric standa sig vel og ég hef notað hann nokkrum sinnum í fjórða leikhluta á tímabilinu í staðinn fyrir Russell á þessu tímabili þó að það gerist ekki oft," sagði Brooks og bætti við:

„Russell er ótrúlegur leikmaður og hann er okkar aðalleikstjórnandi. Það gekk hinsvegar allt svo vel þegar Eric var inn á vellinum og því þurfti Russell að sitja að þessu sinni. Eric stjórnaði leiknum vel og tók allar réttu ákvarðanirnar," sagði Brooks.

Oklahoma City tapaði þeim 28 mínútum sem Westbrook spilaði með 10 stigum en vann þær 19 mínútur sem Maynor spilaði með 18 stigum. Maynor var með 13 stig í leiknum og tapaði ekki einasta bolta. Westbrook var með 18 stig, 4 stoðsendingar og 4 tapaða bolta.