Chicago Bulls átti ekki í vandræðum með Miami Heat

Chicago Bulls sigraði Miami Heat nokkuð örugglega 103-81 í fyrsta leiknum í úrslitum Austurdeildarinnar í NBA deildinni í körfubolta í nótt. Þetta var fyrsti leikurinn en það lið sem fyrr vinnur fjóra leiki kemst í úrslit. Chicago vann allar viðureignirnar gegn Miami í deildarkeppninni og virðist liðið hafa gott tak á „stjörnuliðinu" frá Flórída.

Derrick Rose, sem var valinn besti leikmaður deildarinnar, skoraði 28 stig fyrir Bulls en næsti leikur er á miðvikudaginn í Chicago. Enski landsliðsmaðurinn Luol Deng skoraði 21 stig fyrir Chicago en hann lék einnig frábæra vörn gegn LeBron James sem skoraði aðeins 15 stig og hitti aðeins úr 5 af 15 skotum sínum utan af velli. Carlos Boozer skoraði 14 stig og tók 9 fráköst fyrir heimamenn í Chicago.

Chris Bosh, sem hefur mátt þola mikla gagnrýni fyrir leik sinn með Miami í vetur, skoraði 30 stig og tók 9 fráköst. Dwayne Wade skoraði 18.

Chicago hristi Miami liðið af sér um miðjan þriðja leikhluta þegar staðan var 58-57 fyrir Miami.