Busquets má spila í úrslitaleiknum á Wembley

Knattspyrnusamband Evrópu hefur gefið Sergio Busquets, leikmanni Barcelona, grænt ljóst á að hann megi spila í úrslitaleik Meistaradeildar Evrópu gegn Manchester United í lok mánaðarins.

UEFA hóf rannsókn á Busquets vegna ásakana um að hann hefði verið með kynþáttaníð í garð Marcelo, leikmanni Real Madrid, í leik liðanna í undanúrslitum Meistaradeildarinnar.

Real Madrid sendi inn kvörtun um málið en eftir rannsókn hafnaði UEFA henni, vegna skorts á sönnunargögnum.

Real birti á heimasíðu sinni myndskeið sem á að sýna að Busquets kallaði Marcelo „mono“ (apa), í fyrri undanúrslitaleiknum gegn Barcelona. UEFA sagði að sönnunargögnin í málinu væru þrátt fyrir það ekki nægilega sterk.