Mourinho mun berjast gegn banninnu

Aitor Karanka, aðstoðarmaður Jose Mourinho hjá Real Madrid, segir að sá síðarnefndi sé allt annað en sáttur við fimm leikja bannið sem hann fékk hjá Knattspyrnusambandi Evrópu í dag.

Mourinho var rekinn af velli þegar að Real Madrid mætti Barcelona í fyrri viðureign liðanna í undanúrslitum Meistaradeildar Evrópu í lok apríl. Hann fékk bannið fyrir hegðun sína bæði á meðan leiknum stóð og eftir hann.

Hann er þegar búinn að taka út einn leik í banni en Mourinho fékk ekki að vera á hliðarlínunni er Real Madrid mætti Barcelona í síðari viðureigninni. Barcelona komst áfram eftir samanlagðan 3-1 sigur.

Real Madrid hefur þegar tilkynnt að félagið muni áfrýja úrskurðinum.

„Mourinho ætlar að verja sig fram í það síðasta," sagði Karanka við spænska fjölmiðla. „UEFA hefur ekki enn tjáð sig um ástæður bannsins og mun Mourinho ekki tjá sig sjálfur á blaðamannafundum fyrr en það verður gert."

„Mourinho veit að hann nýtur fulls stuðnings allra hjá félaginu sem og stuðningsmanna þess."

Skemmst er að minnast þegar að Mourinho mætti á blaðamannafund en lét aðstoðarþjálfara sinn, Karanka, tala fyrir sig. Fjöldi spænskra blaðamanna gengu þá út af fundinum.