Sendi Japanskeisara samúðarkveðjur frá íslensku þjóðinni

Ólafur Ragnar Grímsson, forseti Íslands, sendi í morgun Akihito Japanskeisara samúðarkveðjur frá sér og íslensku þjóðinni.

Í skeytinu kemur fram að hinar hræðilegur afleiðingar jarðskjálftanna hafi vakið djúpa samúð og hugur Íslendinga sé með fjölskyldum og vinum þeirra sem látist hafa og einnig þeim sem misst hafa heimili sín og búa nú við óvissa framtíð.

Þá segir að vinátta Íslands og Japans sé byggð á langvarandi samvinnu og Íslendingar þekki jarðskjálfta og náttúruhamfarir af eigin raun þótt reynsla okkar hafi blessunarlega ekki verið eins sár og sú sem nú þjáir hina japönsku þjóð.