Van der Vaart klár - óvíst með Bale

Stuðningsmenn Tottenham fengu góðar fréttir í dag en þeir Rafael van der Vaart og Gareth Bale æfðu báðir með liðinu í morgun.

Tottenham tekur á móti Milan í Lundúnum á morgun í síðari viðureign liðanna í 16-liða úrslitum Meistaradeildar Evrópu. Tottenham vann fyrri leikinn á útivelli, 1-0.

Tottenham staðfesti nú síðdegis á Twitter-síðunni sinni að van der Vaart sé orðinn leikfær á ný en að enn sé óvíst hvort að Bale nái sér af sínum meiðslum í tæka tíð. Hann verður aftur skoðaður á morgun og verður þá ákvörðun tekin.

Van der Vaart hefur ekkert spilað síðan í fyrri leiknum og Bale er nýbyrjaður að spila aftur eftir sex vikna fjarveru vegna meiðsla í baki.

„Ég mun stilla upp sókndjörfu liði," sagði Harry Redknapp, stjóri Tottenham í dag og var vongóður fyrir hönd Bale. „Aaron Lennon verður í liðinu og Gareth Bale mun líklega spila."

Bale spilaði sinn fyrsta leik síðan í janúar þegar að Tottenham gerði 3-3 jafntefli við Wolves um helgina.