Harry Redknapp: Leið ekki vel þessar 90 mínútur

Harry Redknapp, stjóri Tottenham, varð í kvöld fyrsti enski stjórinn sem kemur liði inn í átta liða úrslit Meistaradeildarinnar þegar hans menn slógu út ítalska liðið AC Milan. Liðin gerðu markalaust jafntefli á White Hart Lane en Tottenham vann fyrri leikinn 1-0 á San Siro.

„Þetta var frábært kvöld fyrir alla og ég er mjög ánægður. Við unnum gríðarlega vel á móti góðu liði. Við hlupum af okkur sokkana og náðum að halda í við þá en við vorum undir á miðjunni," sagði Harry Redknapp.

„Ég hafði gaman af þessari stóru stund en ég get ekki sagt að ég hafi skemmt mér sérstaklega vel þessar 90 mínútur. Maður var bara að horfa á klukkuna og vonast til þess að þessar 90 mínútur væru liðnar," sagði Harry Redknapp.

„Við viljum að sjálfsögðu sleppa við að mæta Barcelona en það er bara frábært að við séum komnir í inn í átta liða úrslitin," sagði Redknapp.