NBA: Áttundi sigur Denver í nótt og sjaldgæfur Nets-sigur

Cleveland Cavaliers og Los Angeles Lakers unnu bæði sannfærandi sigra í NBA-deildinni í nótt en uppgangur Denver Nuggets hélt einnig áfram með áttunda sigri liðsins i röð og lélegasta lið deildarinnar, New Jersey Nets, náði einnig að vinna sjaldgæfan sigur.

J.R. Smith með 22 stig í 97-92 útisigri Denver Nuggets á Houston Rockets en þetta var annars sigur liðsins í röð án Carmelo Anthony og sá áttundi í röð alls. Kenyon Martin var með 12 stig og 15 fráköst og Chauncey Billups skoraði 21 stig. Aaron Brooks var með 22 stig fyrir Houston.

San Antonio Spurs endaði þriggja leikja taphrinu með 105-90 sigri á Atlanta Hawks þar sem Tim Duncan setti persónulegt met með því að taka 27 fráköst auk þess að hann skoraði 21 stig. Þetta var aðeins annar sigur Spurs í sjö leikjum. Joe Johnson skoraði 31 stig fyrir Hawks-liðið sem var búið að vinna þrjá í röð.

Kris Humphries skoraði 25 stig fyrir New Jersey Nets sem slapp við metjöfnun með því að vinna 103-87 sigur á Los Angeles Clippers. Þetta var aðeins 4 sigur liðsins í 44 leikjum en metið yfir fæsta sigurleiki í fyrstu 44 leikjum á Dallas-liðið frá 1993-94 en það vann aðeins 3 leiki. Nets var búið að tapa 11 leikjum í röð fyrir leikinn í nótt.

J.J. Hickson var með 23 stig og LeBron James gat dundað sér á bekknum allan fjórða leikhlutann þegar Cleveland Cavaliers vann auðveldan 109-95 sigur á Minnesota Timberwolves. James var með 12 stig, 11 stoðsendingar og 6 fráköst en Cleveland hafði á undan leikið sjö spennuleiki í röð sem höfðu unnist samanlagt með aðeins 21 stigi.

Kobe Bryant var með 29 stig og Andrew Bynum bætti við 27 stigum þegar Los Angeles Lakers vann 118-96 útisigur á Indiana Pacers. Bryant bætti við 9 fráköstum og 7 stoðsendingum og Bynum var með 12 fráköst. Pau Gasol (21 stig, 13 fráköst) og Lamar Odom (12 stig, 14 fráköst) voru einnig öflugir í leiknum.

Deron Williams var með 24 stig í 106-95 sigri Utah Jazz á Portland Trail Blazers en Utah-liðið skorað 21 af fyrstu 23 stigum leiksins. þetta var áttundi sigur Jazz-liðsins í níu leikjum.

Chris Paul var með 38 stig í 123-110 sigri New Orleans Hornets á Golden State Warriors en hann hitti úr 14 af 19 skotum sínum og var með 9 stoðsendingar og 6 fráköst.

Úrslit allra leikja í NBA-deildinni í nótt:

Cleveland-Minnesota 109-95

Indiana-LA Lakers 96-118

Toronto-Miami 111-103

New Jersey-LA Clippers 103-87

Detroit-Memphis 93-99

Milwaukee-Philadelphia 91-88

Oklahoma City-Chicago 86-96

San Antonio-Atlanta 105-90

Houston-Denver 92-97

Portland-Utah 95-106

Golden State-New Orleans 110-123