Kærði þar sem kærasta fékk stærri pakka en krakkarnir

Fyrrum eiginkona NBA-stjörnunnar, Dwyane Wade, hefur kært núverandi kærustu Wade á þeim forsendum að sambandið sé að skapa börnum hennar og Wade tilfinningalegum vandræðum.

Wade er að slá sér upp með leikkonunni Gabrielle Union sem segir að ásakanirnar séu rangar. Wade hefur sjálfur sagt að ákæran sé glórulaus með öllu.

Samkvæmt ákærunni á Union að hafa staðið fyrir forleik fyrir framan börnin sem hafi síðan skaddað drengina. Einnig er fyrrum eiginkonan ósátt við að drengirnir hafi fengið miðlungsjólagjafir frá pabbanum á meðan kærastan hafi fengið stærsta pakkann. Það á líka að hafa skaðað drengina. Vill eiginkonan fyrrverandi fá litla 50 þúsund dollara vegna málsins.

Þessi kæra er enn einn kaflinn í langri skilnaðarsögu Dwayne og Siohvaughn Wade. Þau byrjuðu saman í framhaldsskóla en skildu að borði og sæng fyrir um tveimur árum síðan. Þau eiga tvo syni saman sem eru 8 og 2 ára.

Skilnaður þeirra hefur verið afar ljótur svo ekki sé meira sagt. Þau slást þessa dagana um forræði yfir drengjunum. Dwyane hefur farið fram á að fá fullt forræði og vill þess utan að Siohvaughn verði send i geðrannsókn.