Knicks ætlar að fá aðra stórstjörnu

Forráðamenn NY Knicks eru vongóðir um að koma Amar´e Stoudemire muni verða þess valdandi að fleiri toppmenn gangi í raðir félagsins.

Stoudemire mun skrifa undir fimm ára samning við félagið á næstu dögum sem mun færa honum í kringum 100 milljón dollara í vasann.

"Mér finnst frábært að vera frumherji og ég sýni með þessu að ég er leiðtogi," sagði Stoudemire hógvær fyrir utan heimavöll Knicks, Madison Square Garden.

Knicks á enn rúm undir launaþakinu fyrir annan leikmanna og hefur ekki útilokað að næla í LeBron James, Dwyane Wade eða Chris Bosh.

Stoudemire hefur sjálfur verið í sambandi við umboðsmenn þessara leikmanna.

"Ég er algjörlega sannfærður um að mínir leiðtogahæfileikar muni lyfta þessu félagi í hæstu hæðir."

Hjá Knicks hittir Stoudemire fyrir þjálfarann Mike D´Antoni sem þjálfaði hann áður hjá Phoenix Suns þaðan sem hann kemur til New York.