Messi einu marki frá markameti Barcelona í Meistaradeildinni - myndir

Lionel Messi fór á kostum í 4-0 sigri Barcelona á Stuttgart í sextán liða úrslitum Meistaradeildarinnar í gær. Messi skoraði tvö mörk í leiknum og hefur þar með skorað 21 mark í Meistaradeildinni frá upphafi.

Hér fyrir neðan má sjá myndasafn frá eftirminnilegu kvöldi litla argentínska snillingsins á Camp Nou í gær.

Eftir þessi tvö glæsilegu mörk þá vantar Lionel Messi aðeins eitt mark upp á að jafna markamet félagsins í Meistaradeildinni en það met á Brasilíumaðurinn Rivaldo. Messi hefur skorað mörkin sín í 42 leikjum, 9 þeirra komu í fyrra en hann hefur skorað 4 mörk í átta leikjum á þessu tímabili.

Messi vantar ennfremur fjögur mörk til viðbótar til þess að jafna landa sinn Hernán Crespo sem er sá Argentínumaður sem hefur skorað flest mörk í Meistaradeildinni frá upphafi.