Mourinho búinn að bjóða Raúl að vera í Materazzi-hlutverki hjá Real

Spænskir fjölmiðlar hafa skrifað um það í morgun að Jose Mourinho sé búinn að bjóða Raúl González hlutverk í Real Madrid liðinu undir sinni stjórn. Mourinho fundaði með Raúl á Santiago Bernabéu áður en hann hitti blaðamenn þar sem hann var kynntur sem nýr þjálfari Los Galácticos.

Mourinho vill að Raúl taki að sér svipað hlutverk og Marco Materazzi var í hjá Internazionale Milan. Hann myndi kannski ekki spila margar mínútur en vera gríðarlega mikilvægur leiðtogi í búningsklefanum sem og utan vallar.

Raúl er 32 ára gamall og fékk ekki mörg tækifæri í stjörnuprýddri framlínu liðsins á síðasta tímabili. Það hefur verið búist við því að hann færi frá liðinu í sumar.

Raúl er enn að vinna sig út úr meiðslunum sem hann varð fyrir í lok tímabilsins. Hann segist vera búinn að ákveða hvað hann gerir en hann ætlar ekki að tilkynna það fyrr en hann snýr aftur úr sumarfríi 1. júlí.

Raúl meiddist á liðbandi í hægri ökkla en náði að skora rétt áður en hann varð að yfirgefa völlinn. Það var 322 mark hans fyrir Real Madrid en enginn leikmaður hefur skorað fleiri mörk fyrir félagið í öllum keppnum.

Raúl hefur verið fyrirliði Real Madrid þegar hann hefur komist í liðið. Hann hefur leikið með liðinu frá og með 1994-95 tímabilinu og alls unnið spænsku deildina sex sinnum og Meistaradeildina þrisvar sinnum sem leikmaður Real Madrid.