Um 160 fjárnám vegna vanskila á námslánum

Hjá lögmannsstofnunum Juris og Mandat hafa verið gerð um 160 fjárnám fyrir Lánasjóð íslenskra námsmanna frá haustinu 2008 vegna vanskila. Þetta segir í svari Katrínar Jakobsdóttur, mennta- og menningarmálaráðherra, við fyrirspurn Margrétar Tryggvadóttur, þingmanni Hreyfingarinnar.

Juris og Mandat sjá um innheimtu fyrir Lánasjóðinn ásamt Intrum samkvæmt samningi sem sjóðurinn hefur gert við þessi fyrirtæki. Í svari menntamálaráðherra kemur fram að Lánasjóðnum hafi þótt hagkvæmara að semja við innheimtuaðila um innheimtuþjónustu í stað þess að setja upp sérstaka innheimtudeild hjá sjóðnum vegna þessa. Þannig hafi lögmenn um ártugaskeið annast lögfræðilega innheimtu námslána í góðu samráði við sjóðinn.

Hins vegar sé fruminnheimta námslánanna hjá sjóðnum þar sem skuldurum sé boðin fjölþætt úrræði til þess að standa í skilum, svo sem fjögurra eða sex mánaða greiðsludreifing, undanþága frá afborgun, frysting og fleira.

Samkvæmt svari ráðherra gefur LÍN út 53.652 greiðsluseðla á ári og eru lánþegar LÍN 29.595 talsins. Um 1,5% af kröfum fara í löginnheimtu.