NBA: San Antonio og Chicago aftur á sigurbraut

San Antonio Spurs og Chicago Bulls unnu bæði sína leiki í NBA-deildinni í körfubolta í nótt eftir að sigurgöngur liðanna enduðu í leiknum á undan. Spurs vann Washington Wizards en Chicago vann nágrannana í Detroit í framlengingu.

Tony Parker var með 20 stig og 14 stoðsendingar þegar San Antonio Spurs vann 94-80 sigur á Washington Wizards en ellefu leikja sigurganga liðsins endaði á móti Orlando í leiknum á undan.

Manu Ginobili skoraði ennfremur 21 stig fyrir Spurs en stigahæstur hjá Washington var Rashard Lewis með 21 stig. Wizards-liðið var án þeirra Andray Blatche og JaVale McGee sem tóku út eins leiks agabann fyrir að slást fyrir utan skemmtistað á Þorláksmessu.

Carlos Boozer var með 31 stig og 11 fráköst þegar Chicago Bulls vann 95-92 útisigur á Detroit Pistons eftir framlendan leik. Derrick Rose var með 23 stig, 12 fráköst og 8 stoðsendingar fyrir Chiacago sem hafði tapað fyrir New York daginn áður.

Tayshaun Prince skoraði 17 stig fyrir Detroit-liðið en það var Charlie Villanueva sem kom leiknum í framlengingu með því að jafna 0.6 sekúndum fyrir leikslok eftir þriðja sóknarfrákast liðsins í lokasókninni.

Nýliðinn Blake Griffin átti enn einn stórleikinn þegar lið hans Los Angeles Clippers vann 108-103 sigur á Phoenix Suns. Griffin náði sinni átjándu tvennu í röð með því að skora 28 stig og taka 12 fráköst. Eric Gordon var með 24 stig fyrir Clippers og Baron Davis bætti við 15 stigum og 9 stoðsendingum. Mickael Pietrus skoraði 25 stig fyrir Phoenix og Steve Nash var með 21 stig og 15 stoðsendingar.

Jrue Holiday skoraði 22 stig og Thaddeus Young var með 20 stig þegar Philadelphia 76ers kom til baka í fjórða leikhluta og vsnn 95-89 útisigur á Denver Nuggets. Elton Brand var með 16 stig og 17 fráköst hjá Philadelphia en Chauncey Billups skoraði 24 stig fyrir Denver sem lék sinn þriðja leik án Carmelo Anthony eftir að hann missti systur sína.

Michael Beasley tryggði Minnesota Timberwolves 98-97 sigur á Cleveland Cavaliers með því að skora sigurkörfuna 5,9 sekúndum fyrir leikslok. Minnesota var búið að tapa sjö leikjum í röð fyrir leikinn.

Luke Ridnour skoraði 23 stig fyrir Minnesota og Kevin Love náði 26. tvennu sinni á tímabilinu með því að skora 16 stig og taka 18 fráköst. Antawn Jamison skoraði 24 stig fyrir Cleveland-liðið sem hefur tapað 13 af síðustu 14 leikjum sínum.

Chris Paul var með 22 stig og 8 stoðsendingar þegar New Orleans Hornets vann 93-86 sigur á Atlanta Hawks. David West bætti við 18 stigum, Emeka Okafor var með 14 stig og 15 fráköst og Trevor Ariza skoraði 12 stig og tók 10 fráköst. Joe Johnson skoraði mest fyrir Atlanta eða 23 stig.

Rudy Gay var með 30 stig þegar Memphis Grizzlies endaði þriggja leikja taphrinu sína með 104-90 útisigri á Indiana Pacers. Zach Randolph var með 18 stig og 16 fráköst í leiknum og þeir O.J. Mayo og Marc Gasol skoruðu báðir 17 stig. Danny Granger var stigahæstur hjá Indiana með 29 stig.

Úrslit allra leikja í NBA-deildinni í nótt:

Los Angeles Clippers-Phoenix Suns 108-103

Cleveland Cavaliers-Minnesota Timberwolves 97-98

Detroit Pistons-Chicago Bulls 92-95 (framlengt)

Indiana Pacers-Memphis Grizzlies 90-104

New Orleans Hornets-Atlanta Hawks 93-86

San Antonio Spurs-Washington Wizards 94-80

Denver Nuggets-Philadelphia 76ers 89-95