Viðskipti erlent

Kostnaður BP í Mexíkóflóa kominn yfir milljarð dollara

Kostnaður breska olíufélagsins BP vegna olíulekans í Mexíkóflóa er nú kominn yfir einn milljarð dollara eða um 130 milljarð kr. Þetta kemur fram í tilkynningu frá félaginu. Búast má við að kostnaðurinn verði mun hærri en nemur þessari upphæð þegar upp er staðið.

Fram til þessa hefur BP greitt 15.000 einstaklingum og lögaðilum skaðabætur vegna olíulekans og er meðalfjárhæð bóta til hvers 340 þúsund kr. Hingað til hafa 30.000 einstaklingar og lögaðilar krafist bóta frá BP vegna lekans.

Þessar upphæðir eru þó smámunir samanborið við tapið hjá hluthöfum BP frá því að olíulekinn hófst fyrir nokkrum vikum. Hlutir í BP hafa lækkað stöðugt síðan og er gengistap hluthafanna nú orðið hátt í 100 milljarðar dollara.

Þegar fréttist í gær að hugsanlega myndi taka tvo mánuði í viðbóta að stöðva lekann féllu hlutir í BP um 14% í kauphöllinni í London. Þetta er mesta verðfall þeirra á einum degi síðan árið 1992. Frá því að lekinn hófst hafa hlutir í BP rýrnað um 25% að verðgildi.







Mest lesið


Fleiri fréttir

Sjá meira


×

Mest lesið