Ronaldo: Við höfum aldrei verið betri en einmitt núna

Stjörnuleikmaðurinn Cristiano Ronaldo hjá Real Madrid er sannfærður um að spænska félagið geti unnið alla þá titla sem enn eru í boði.

Ronaldo telur að Real Madrid sé að toppa á réttum tíma fyrir mikilvæga leiki í Meistaradeildinni og lokasprettinum í spænsku deildinni.

„Við höfum aldrei verið betri en einmitt núna og stefnum ákveðnir á sigur í bæði Meistaradeildinni og spænsku deildinni. Við unnum síðasta leik í deildinni og ég er ánægður með mörkin mín í þeim leik en stigin þrjú voru þó vitanlega aðal atriðið.

Við þurfum að halda áfram á sömu braut og ég er sannfærður um að við gerum það," segir Ronaldo í viðtali við Marca.

Real Madrid mætir Lyon í fyrri leik liðanna í 16-liða úrslitum Meistaradeildarinnar annað kvöld.