Real Madrid á ekki að hræðast önnur lið

Cristiano Ronaldo, leikmaður Real Madrid, segir að leikmenn Real Madrid mæti kokhraustir til leiks í Meistaradeildinni í ár enda óttist liðið engan andstæðing.

Real er í erfiðum riðli með AC Milan, Ajax og Auxerre.

"AC Milan er búið að styrkja sig mikið. Leikirnir gegn Milan verða mjög erfiðir en við eigum ekki að hugsa um þá. Við erum Real Madrid og eigum ekki að hræðast neinn," sagði Potúgalinn kokhraustur sem fyrr.

"Ég er klár á því að við munum vinna eitthvað í vetur. Ég hef góða tilfinningu fyrir tímabilinu. Við verðum að vinna eitthvað. Ég get ekki boðið sjálfum mér upp á að vinna ekki neitt í tvö ár."