Slökkviliðsmaður fluttur á slysadeild

Einn slökkviliðsmaður var fluttur á slysadeild til aðhlynningar eftir slökkvistarf á Laugavegi 40 í kvöld. Samkvæmt upplýsingum sem Vísir fékk af varðstofu slökkviliðsins er líklegt að maðurinn hafi ofreynt sig í starfi.

Eldurinn kom upp í risi á húsinu og slökkvistarf var flókið. Rífa þurfti hluta af þaki á húsinu. Að auki voru nokkrar skemmdir á risi hússins.

Slökkvistarfi lauk um hálfeitt í nótt, en vakt verður við húsið eitthvað frameftir nóttu. Íbúar hússins fá ekki að gista í því í nótt. Einn maður þáði gistingu á vegum Rauða krossins.