Opinber lögreglurannsókn á íslensku bönkunum í Bretlandi

Efnahagsbrotadeild bresku lögreglunnar (Serious Fraud Office) mun á næstu dögum tilkynna um að opinber lögreglurannsókn sé hafin á starfsemi íslensku bankanna í Bretlandi. Mun rannsóknin m.a. beinast að lánveitingum þeirra til „þekktra einstaklinga".

Greint er frá þessu bæði í blöðunum Guardian og Telegraph í dag. Í Guardian segir að rannsóknin muni beinast að öllum bönkunum þremur, Landsbanka, Glitni og Kaupþingi en í frétt Telegraph er aðeins getið um Kaupþing.

Þá hefur Telegraph heimildir fyrir því að stjórnarmenn Singer & Friedlander, banka Kaupþings í Bretlandi, hafi þegar ráðið sér þekktan breskan lögfræðing vegna þessarar komandi rannsóknar. Lögfræðingurinn heitir Ian Burton og hefur sérhæft sig í fjársvikamálum. Hann er einn eigenda lögmannsstofunnar Burton Copeland.

Fram kemur í Telegraph að undanfari rannsóknarinnar sé upplýsingasöfnun á vegum Serious Fraud Office undanfarna fjóra mánuði. Þar hafi lögreglan notið liðsinnis sérstaks saksóknara á Íslandi sem og Evu Joly sem aðstoðar íslensk yfirvöld.

Guardian hefur eftir Richard Alderman forstjóra Serious Fraud Office að „madame Joly hefur verið í London og okkar menn hafa verið í Reykjavík. Við vinnum mjög náið með íslenskum yfirvöldum."

Meðal þeirra „þekktu einstaklinga" sem tengjast komandi rannsókn nefna bæði blöðin Robert Tchenguiz og Kevin Stanford.