Klinsmann: Bayern spilar upp á stoltið

Jurgen Klinsmann, þjálfari Bayern Munchen, vill að leikmenn liðsins geti borið höfuð sitt hátt eftir síðari leikinn við Barcelona í Meistaradeildinni í kvöld.

Bayern fékk skell og tapaði með fjórum mörkum í fyrri leiknum á Spáni og því er ekki hægt að segja að liðið eigi raunhæfa möguleika á að komast áfram í undanúrslitin.

"Ég hugsa að menn dreymi nú ekki um að salla fjórum eða fimm mörkum á þá, en það væri frábært að ná að vinna þá í kvöld. Við viljum vinna Barcelona og kveðja keppnina á mannsæmandi hátt. Við viljum að menn sýni ástríðu og baráttuanda fyrir framan áhorfendur okkar," sagði Jurgen Klinsmann.

"Það er mikilvægt fyrir okkur að læra af liðum eins og Barcelona. Þeir sýndu okkur takmörk okkar, en það er líka gaman að bera okkar lið saman við þeirra og sjá hvar við þurfum að bæta okkur," sagði Klinsmann.