Benitez ögrar fyrirliða sínum

Steven Gerrard, fyrirliði Liverpool, hefur verið í fantaformi með liði sínu að undanförnu. Rafa Benitez knattspyrnustjóri liðsins segir að miðjumaðurinn standi frammi fyrir mikilli áskorun í einvíginu við Chelsea í Meistaradeildinni sem hefst í kvöld.

"Það er mjög erfitt að ráða við Stevie þegar hann er upp á sitt besta, en við verðum að muna hvaða lið við erum að fara að spila við. Við mætum liði með mjög góða leikmenn í sínum röðum. Ef menn eins og Michael Essien, Michael Ballack og Frank Lampard eiga góða leiki, eru þeir mjög erfiðir viðureignar," sagði Benitez.

"Við metum allir framlag Gerrard mikils og sú staðreynd að hann er búinn að framlengja við Liverpool sýnir að við erum að vinna vinnuna okkar. Það er hinsvegar ljóst að hann horfir fram á mikla áskorun á móti Chelsea," sagði Benitez.