Lofar fjölskyldunni öðrum úrslitaleik í Meistaradeildinni

Darren Fletcher, leikmaður Man. Utd, hefur lofað fjölskyldu sinni að draga Man. Utd aftur í úrslit Meistaradeildar Evrópu. Fletcher missti af úrslitaleiknum í fyrra er hann fékk glórulaust rautt spjald gegn Arsenal í undanúrslitunum.

Fletcher var því í banni er United mætti Barcelona í Róm og liðið saknaði hans sárlega í leiknum.

Það sem meira er þá sat Fletcher á bekknum allan leikinn er United vann Meistaradeildina árið áður. Hann hefur þó ekki gefist upp á að fá að spila úrslitaleik í Meistaradeildinni.

„Ég reyni að hugsa ekki of mikið um þetta. Er bara þeim mun ákveðnari að komast aftur í úrslitaleikinn. Þegar ég var rekinn út af gegn Arsenal hringdi mamma mín og systir í mig. Þær voru báðar grátandi," sagði Fletcher.

„Ég reyndi að bera mig vel gagnvart fjölskyldunni sem var algjörlega miður sín. Ég lofaði þeim því að ég myndi draga liðið í annan úrslitaleik," sagði Fletcher brattur.