Mourinho: Þurfum bara að vinna heimaleikina okkar

Knattspyrnustjórinn Jose Mourinho hjá Inter er ekki af baki dottinn eftir jafnteflið gegn Rubin Kazan í gærkvöld og þó svo að lið hans sé enn ekki búið að landa sigri eftir tvær umferðir í riðlakeppni Meistaradeildarinnar.

Mourinho er sannfærður um að liðið þurfi bara að vinna heimaleiki sína gegn Rubin Kazan og Dynamo Kiev til þess að fara upp úr riðlinum.

„Miðað við hvernig leikurinn gegn Rubin Kazan þróaðist, þar sem við lékum manni færri síðasta hálftímann, þá voru þetta jákvæð úrslit fyrir okkur. Það eru enn fjórir leikir eftir í riðlinum og við þurfum bara að vinna heimaleiki okkar til þess að komast áfram," segir Mourinho.